LA SCROVE

Lettera di Don Luigi Gloazzo

Chei che a vivin sul ôr de societât a san che intai moments plui problematics e àn dome di rangjâsi e si cjatin bessôi a sbarcjâ lunari. Impen che la plui part de int e je intal câs di proviodi ae sô vite di ogni dì par vie dai mieçs che e parone, de istruzion, de posizion sociâl, de famee, dai contats cu lis personis de societât, dal pês dal tacuin, de innomine e dai titui, dai onôrs, dai dirits presumûts o dai privileçs. In ogni societât a son chei bogns di proviodi par se, laudât Idiu!

Par lôr la societât, la leç, la culumie, lis religjons e àn conseis, disposizions, normis, atenzions e cure, stant che a son bielzà intal siarai. Inte societât, pal plui, si fevele, si fasin regulis, si resone, si pontifiche pai chei di mieç, pai scuelâts, par chei che e àn computer e internet, par chei che a van a cori in biciclete la sabide e domenie par parâ vie la mufe e la cagnate de setemane o il fîl di grassin che si è dât dongje inte gnervidure atletiche, par chei che a van a spassizâ cu la tute di gjinastiche e la bandane sul çarneli, par chei palestrâts o chei che a frecuentin i cors di Yoghe sot la direzion di un mestri che si è imbombît intal Gange, intai agns dai disingjans, dai traspuarts flaps e des smaniis pes emozions chimichis. Dut pulît, nuie ce dî. A son la plui part de int di une societât evolude, passude, stufadice, preocupade di se, forsit ancje de salût de Borse e dal Spread. A son chei che no ur interesse la culumie reâl, ma a scrutinin su chê finanziarie, 13 voltis plui grande di sô mari e là che si fasin i bêçs tant che cul Grate e Vinç. Ducj e àn pôre, clâr, ma chescj a podin stâ devant de television e dal computer par fevelâsi in video-conference, par savê cemût che e scapole la Borse di Singapôr e di Sangai, chê di Londre e di Wall Street. E se lis robis a laran mâl par un trat di timp, come che a laran, il Stât, o timp o tart, al proviodarà pe plui part di lôr.

Ma chei altris ce si metino a fâ inte circostance dal Virus?

La plui part dai sportei dai Servizis publics a son sierâts, la int mandade in feriis, a recuperâ oris fatis in soreplui o preservade in ufici de contaminazion ipotetiche. Chei che a son restâts a fâ acet a inviin “sconsortâts” i “utents” a la Caritas. I ultins de societât si cjatin a no sedi di nissun, di no vê une protezion e, di conseguence, obleâts a scantinâ des regulis açalinis che si burissin fûr a ogni pît alçât a pene che si dâ dongje cualchi Zonte nazionâl, regjonâl o cjasandrine. Ce fasino lis personis bessolis, chês che no àn nancje i bêçs par fâ la spese, lis maris bessolis cun prole di asîl o di scuele elementâr, chei cence cjase e famee che a passin la gnot intal Asîl e che no podin lâ fûr di lì vie pal dì, come che di regule a scugnaressin, chei che ur à scjadût il permès di stâ chenti e a varessin di tornâ a cjase lôr o, almancul, lâ fûr dai voi, chei che e àn la rate dal mutui che ur scjât e la paiavin cun vorutis a neri intes fameis, lis feminis che a levin a fâ voris a neri (la plui part magari cussì no), lis Badantis che bielzà a son tant che muinis di clausure, la int che e ven atindude dai operadôrs des cooperativis sociâls.

Cun dut che tancj si disin preocupâts par vie che a cressin la puaretât, la mancjance di vôre e la disocupazion, la disparitât, la concentrazion des jentradis e de ricjece e ce altri, no si invie, ma la fe no, un mût di vivi e di cressi diferent e alternatîf a chel che o sin dentri spaurîts. Ducj a semein ai purcituts apene nassûts. Un pôs a cjapin la tete a voi sierâts e no la molin. Altris no rivin a cjapâle e no la cjaparan mai altri, nancje a vuicâ. Ur restaran juste i disgots. Lôr mari si clamile scrove, par furlan. Ma jê nancje no si volte, no si ufint. E sta scrofade e chei che no rivin a cjapâ la tete piês par lôr! Ancje intes emergjencis lis regulis buridis fûr a tamesin i scaltris, i stupits e i puars. Chei che a ‘ndi àn masse o no àn nuie ce pierdi, par vie che sul “granâr” o no ‘ndi è o no ‘ndi àn.

O vin dome di avodâsi a la int di bon cûr e a lis organizazions che lu fasin par vocazion e par fede. Se chestis a tegni dûr, se a continuin a stâ e a viodi dai ultins, dai ultins dai ultins, dai dismenteâts cronics, dai cence non e dirits, dai cence “logo e fogo”, al sucêt il vêr miracul uman e comunitari.

Dut câs, la int si è cualificade tra chei che simpri e cun dute la inteligjence e passion a curin il prodot e chei che a curin lis personis, massime chês che nissun viôt di lôr. Cheste brave int, cun dut che e je une minorance, e ten su il mont e impiade la sperance.

Pre Vigji Glovaz