PASCHE: UNE VITE ALFIN CUMPLIDE

pasche

Lis grandis fiestis de fede cristiane a celebrin il sens scuindût intai fats e situazions doprant no dome la lûs de inteligjence, ma, cundiplui, la intuizion e il cjalt dal cûr. Par chest la liturgjie e je la composizion armoniose di Peraule, peraulis, simbui, rîts, cidins, bonodôrs, lûs, processions, moviments dal cuarp, cjants, preieris e misteri penç.

No si po spiegâ dut e cussì si rapresentin intune rapresentazion sagrade  i moments e i fats de vite par vualmâ e pandi il passaç di Diu inte vite personâl, in chê de famee, de societât, dai popui, dai cristians, de storie e de creazion. No dut ce che al è si lu viôt e no dut al rive al nivel de cussience dal mont di dentri. Come che la persone e reste un misteri a se stesse, baste viodi cemût che nus ven fûr a tradiment il stupit che o vin dentri, cussì il mont e la vite e àn simpri bisugne di sedi interpretâts par cjatâur il sens vivarôs.

Il Pari Eterni, che si intindeve, al à vût bisugne di inviâ dute la creazion, poleade un pôc in dì, viers une mete, un pont di rivade, une plenece che si varès pandude un pas a la volte, ven a stâi intal timp e intal spazi. Une robe creade, tant a dî insuazade intal limit, no podeve, ma lafè no, cressi intun marilamp, ma e veve di cjaminâ, cualchi volte a sburts e ce nol è in buride, inte libertât e responsabilitât dal amôr fat servidôr.

Ve ce che e je la Pasche! E je la vite rivade ae sô plenece, e je la persone che no côr il riscji di lâ indevant a cesse cûl, e je la vision direte che no à bisugne plui dal spieli par cjalâ in sbighet o fuscât. Il Pari Eterni, intal metisi in vore, al cjalave so Fi e cussì nô, almancul par semeâi un tic, o vin di fâ sù la nestre vite, la storie dai umigns e chê de tiere cjalantlu lui, Gjesù Crist nestri Signôr e Fradi di ducj.

La Pasche e regale il sens a ogni cjosse, ancje a chês robutis di nuie, ai particolârs, a lis robis che a passin intal tamês a la fin de zornade e de setemane par lassânus juste i sporcheçs. O cjaminìn viers une mete e no a câs e cence savê dulà. Par chest o doprìn dispés simbui e imagjinis che a son tant che clâfs che nus vierzin lis puartis misteriosis de cjase de vite. La esperience dal Esodi biblic intal desert e la sperance di jentrâ inte Tiere Prometude a son deventadis une vore buinis par dâ un sens ancje a la nestre vite personâl, a chê de nestre famee, dal popul di Diu, de societât e de creazion infinide.

Nol è un câs che ancje San Pauli al vedi di doprâ la imagjine des doiis dal part, unic dolôr che al parturìs une vite, par fevelâ de creazion e de sô soference intal dâ fûr creaturis gnovis. Cemût varessial podût Gjesù Crist sedi nestri fradi e Signôr se nol ves fate la stesse strade e la stesse fadie? La incjarnazion e domande serietât e indurance, come che un vore ben fate e domande competence, timp, estri, corezions, polsis e gnots in vegle cul scûr inte anime.

Ancje nô, tant che Crist, o vin di fâ de nestre une storie di salvece, une cjaminade di jessude des piçulis e grandis sclavitûts e dipendencis par un servizi afietôs viers lis personis che no àn nancje muse di umans. A Pasche no si rive di corse e di rive jù, ma dopo 40 agns (une vite!) di garzonât, di decisions, di verifichis, di sburts, di crôs, di aviliments e gaudiis. E je la strade dal amôr fedêl che e puarte a Pasche, tant chê di Crist, come la nestre e dal mont. La Pasche di Crist e je la uniche bielzà realizade, completade. La nestre e vîf di sperance, dal ben fat che nol à ancjemò la gaudie di viodi i risultâts.

Se o vin la gracie di celebrâ la Pasche ancje chest an, cirìn di lassâ che la contemplazion di chê di Crist e travani la nestre vite di ogni dì. O sin come la tiere, simpri vierte a la ploje e al soreli, a lis stagjons dal clip, dal cjalt e dal frêt. Lis stagjons a samein la nestre vite e par chest lis doprìn par fevelâ cun sintiment e savietât de vite de umanitât e di chê eterne. La Pasche di Gjesù Crist no passarà mai, par vie che e je la beorcje dulà che e rive e di alì e torne a partî la storie di ducj e dut.

La Pasche di ognun si coleghe e si insede in chê di Crist e di dute la umanitât, par vie che o sin ducj un cuarp sôl e nissun nol esist cence sedi in relazion continue di dâ e vê cun dut e ducj. Al semee che ognun al varà di spietâ no dome di rivâ di persone e cence deleghe al incuintri cul Creatôr, ma al vedi di fermâsi a spietâ che a rivin ducj, tant o varìn timp!, par dâ dongje la famee umane, come ogni famee la sere tor atôr de taule.

Un altre biele imagjine de Pasche e je chê de gnoçade e de grande taulade dulà che al è puest par ducj. Alì o incuintrarìn chei che nus àn cjaminât devant cirint il stes cjaveç. Ur domandarìn cemût che e àn fat a restâ fedêi e libars intal volê ben in timps di miserie e migrazions, di violencis e capricis dai smafars, di imbrois e furbetâts dai scaltris. Di sigûr nus segnaran cul dêt Gjesù Crist in persone. Crist al è stât l’om che al à puartade a la perfezion la sô umanitât al pont di lassâ viodi clare la sô divinitât.

Ancje nô, savint o no savint, o sin su chê strade, massime chei che in dut il mont a patissin par cualsisei opression e flagjel. E je chê di Pasche. E je la stesse de Crôs e dal Sepulcri. Ma e je tornade a inviâsi di gnûf dal zardin de vite, tant che la prime creazion.

La Glesie furlane us salude cun afiet, cjârs Missionaris dal Vanzeli e de caritât. Cun di plui buine Pasche a ducj chei che a crodin di crodi inte resurezion di une vite alfin cumplide e, massime, a chei che a crodin di no crodi!

 

Pre Vigji Glovaz

(Ai 21 di Avrîl dal 2019)